Gransking í føroyskum tara fingið heiðursløn

Urd Grandorf Bak, sum er í starvi sum vinnugranskari hjá Ocean Rainforest, var kosin at hava besta vísindaliga uppslag (poster) á altjóða tararáðstevnuni 6th Congress of the International Society for Applied Phycology í Nantes í Frankaríki, sum var frá 17-23 juni. Meira enn 500 fólk luttøku á ráðstevnuni, og Urd luttók við tveimum postarum: “Seasonal variation of iodine in Faroese Kelps cultivated offshore for food and feed” og “Seasonal variation of trace metals and inorganic arsenic in Faroese Kelps”.

Tað var postarin um árstíðarbroytingar í jodinnihaldi í føroyskt aldum tara, sum bleiv kosin besti postarin á ráðstevnuni. Niðurstøðan av granskingini er m.a., at jodinnihaldið er munandi hægri um veturin enn um summari í sukurtara (S. latissima), at hesin eisini inniheldur meira jod enn tang (A. esculenta). Granskingarúrslitini vilja økja um vitanina hjá brúkarum í mun til jodinnihald – alt eftir nær tarin verður skorin.

Granskingin er gjørd í samstarvi millum Ocean Rainforest og granskarar frá DTU í Danmark, har Urd er innskrivað sum PhD granskari. Arbeiðið er partur av verkætlanini MacroValue, sum Nordic Innovation viðfíggjar, og verkætlanini MacroCom, sum er fíggjað av danska Innovationstyrelsen og Ocean Rainforest.